CEBU, Philippines – Tungod sa dautang panahon, dul-an 800 ka mga pasahero ang natanggong ug wala makalarga paingon sa ilang destinasyon gikan sa lain-laing pantalan dinhi sa Central Visayas.
Sigon pa sa Philippine Coast Guard natanggong sa mga pantalan sa Cebu City 166, samtang 76 sa Danao City, 60 sa Pilar, Camotes. Sa probinsya sa Bohol, 150 anaa sa Tagbilaran, 80 sa Talibon, ug 234 sa Jagna.
Gikanselar ang mga biyahe human gipaubos sa public storm warning signal number 1 Cebu City ug ang amihanang Sugbo kagahapon sa udto.
Una nang na- stranded ang 170 ka mga Bol-anon nga apil unta sa delegado gikan sa Diocese of Tagbilaran diin nabiktima sa kusog nga linog niadtong Oktubre 2013. (BANAT NEWS)