CEBU, Philippines - Kontrolado ang pagmuntar og mga bleachers sa rota sa Sinulog grand parade karong Domingo. Lakip sa gikontrolar sa siyudad sa Sugbo ang mga nagbabag sa kadalanan ug ang mga magpataka og parking sa ilang mga sakyanan.
Matud sa operations head sa City Traffic Operations Management (CITOM), Jonathan Tumulak, nga ang mga private business establishments angay nga magkuha og permit gikan sa City Hall kun magmuntar og bleachers.
Gibutyag ni Tumulak nga adunay duha ka clearing operations nga ipahigayun sugod ugma’ng adlawa alang sa solemn procession ug sa Sinulog grand parade.
Ugma sa alas 10 sa buntag, magsugod ang clearing operations sa mga obstruction nga makita sa kadalanan nga maagian sa procession. Paninguhaon nga mahuman ang clearing operation sa alas dose sa udto aron makasugod hingpit nga limpyo ang kadalanan nga maagian sa procession.
Ang ikaduhang clearing operation magsugod sa alas 10 sa gabii ugma alang sa preparasyon sa grand parade. (BANAT NEWS)