CEBU, Philippines - Usa ka kanhi soundman sa Bombo Radyo ug nahimo pang staff ni kanhi bise gobernador sa Sugbo Apolonio Abines nagnegosyo na karon og mga gagmay nga imahen sa Senyor Sto. Niño.
Si Dennis Mercado, 46-anyos nga taga Sitio Mahayag, Barangay San Isidro, dakbayan sa Talisay ug ang asawang si Amabel Lastimosa Mercado, 44, usa lamang sa daghang suppliers sa mga relihiyosong rebolto dinhi sa Sugbo nga maoy ilang gibuhi sa ilang mga pamilya.
Matud ni Dennis nga sobra sa napulo ka tuig silang nagtrabaho sa usa ka himoanan og mga rebolto sa santos diha sa Barangay Bulacao, dakbayan sa Talisay. Siya maoy manghimo ug ang iyang asawa mutabang sa pagpamintal.
Apan miabot ang panahon nga dili na paigo ang ilang kinitaan hinungdan nga bisan pagpamasahero sa traysikol gisudlan na ni Dennis ini og tungang gabii human sa trabaho.
Matud ni Dennis nga niadtong higayona magtulo na ang iyang anak hinungdan nga pwerte usab niyang paningkamot aron mabuhi usab niya ang iyang pamilya.
Sama sa uban, nangandoy si Dennis nga moasenso sa kinabuhi kay nasayod siyang dili niya kini makab-ot kung trabahador lang siya hinungdan nga niadtong tuig 1997 nananghid sila sa iyang amo nga mohawa sa iyang trabaho aron magtukod og iyahang kaugalingong buhatanan og rebolto, wala kini ihikaw kaniya sa iyang agalon.
Sa unang tuig, gisugdan nila ang ilang gamay’ng negosyo ug bisan ginagmay pa ilang halin paigo kini sa ilang panginahanglan, hangtud nga naabot ang panahon nga nailhan na sila sa mga mamalitay niini ug nahimo nang supplier sa mga tindahan.
Gibutyag ni Dennis nga ang unang mipalit sa iyang mga hinimo mao ang ubang manindahay diha sa sidewalk sa dakbayan sa Sugbo ug ang Corabel nga usa ka tindahan og mga rebolto sa mga santos.
Karon si Dennis magsuplay na usab og mga rebolto diha sa Basilica Minore del Santo Niño ug ngadto sa simbahan sa Mahal nga Birhen sa Lindogon, Simala. Ang rebolto nga gibuhat ni Dennis gama kini sa poly-lite diin ang labing taas unom ka pulgada nga ibaligya nila og P75 ang buok ug kadtong usa ka pulgada nga dunay dalang pouch P25 ang ilang baligya ug P15 ang kadtong gibutang og jacket nga dunay kalakip nga novena sa Senyor Santo Niño.
Pinaagi niini nakapatukod sila og balay ug gidatadatahan nila ang ilang lote nga gitukoran niini.
Kun kaniadto silang duha lang sa iyang asawa ang nanghimo, karon aduna na sila’y kaugalingong mga trabahador lakip na ang ilang mga anak mutabang usab og buhat sa mga rebolto.
Matud pa ni Dennis nga ang paglambo sa ilang negosyo tubag kini sa kanunay nilang pagsangpit sa Balaang Bata. Sumala pa niya, matag rebolto nga iyang buhaton mangaliya siya kanunay nga suportahan sila sa ilang panginabuhian. (EIM)(BANAT NEWS)