CEBU, Philippines – Duha ang patay sa duha ka managlahi’ng pagpamusil nga nahitabo sa probinsiya sa Sugbo niadtong nakalabay nga adlaw.
Patay ang 33-anyos nga lalaki human pusila sa iya’ng silingan sa sitio Alagasi, barangay Colawin, lungsod sa Argao. Ang biktima naila nga si Jenard Mabida, ulitawo, samtang ang suspek naila nga si Edgar Gecale, 31, ulitawo.
Matud ni PO3 Benjamin Herosaga, desk officer sa Argao Police Station, nga igo sa liog ug lawas ang naangkon sa biktima hinungdan sa iyang kamatayun.
Sumala pa ni Herosaga nga sa wala pa nahitabo ang pagpamusil una’ng nagkalalis ang duha nga misangpot sa sinukmagay apan nauwang sa mga tawo sa lugar. Gumikan sa kalagot sa suspek, dali nga niuli sa ilang balay ug nibalik dala ang wala mailhing kalibre sa armas ug gipusil ang biktima.
Dali sab nga nisibat sa lugar si Gecale.
Sa lungsod sa Ronda, patay sab ang usa ka lalaki human gipusil samtang paingon mosakay sa iyang motorsiklo sa barangay Libo. Ang biktima naila nga si Rolito Fuentes, hingkod, minyo ug nagpuyo sa mao’ng lugar.
Sa imbestigasyon sa kapulisan nasayran nga pasado alas 6 sa buntag kalit lang gipusil sa gunman nga nagtaptap sa nawong ang biktima ug naigo sa nagkadaiyang parte sa lawas.
Gidala sa Barili District Hospital ang biktima apan nakabsan gyud sa iyang kinabuhi.
Nakuha sa kapolisan sa crime scene ang usa ka bala sa 12-guage shotgun ug duha ka basiyo sa 30 M1 carbine. – /GMR) (BANAT NEWS)