CEBU, Philippines – Napatay sa kapolisan ang usa ka tawo nga nakigpinusilay kanila human kini masakpi nga nanglungkab sa Saint Theresa’s College sa General Maxilom Avenue kaniadto’ng Martes sa gabii.
Hangtud kagahapon ang giingon’g tulisan nagpabilin nga wala pa mailhi kay wala’y kabanayan nga miadto kaniya.
Si Chief Inspector Wildemar Tiu, hepe sa Station 2 sa Cebu City Police Office (CCPO), mitug-an nga alas nueve sa miagi’ng gabii nakadawat sila’g alarma nga may lalaki nga nakit-an sa mga guwardiya nga nanglungkab sa tunghaan.
Matud ni Tiu abtik nga miresponde ang iyang mga sakop. Pag-abot sa mga polis, misuway sila pag-awhag nga motahan ang suspetsado’ng kawatan apan nagpabuto kini’g armas. Ang tawo miambak sa kural sa tunghaan mao nga nahitabo ang ginukdanay.
Gipusil sa tawo ang mga migukod kaniya nga polis apan wala makaigo mao nga gibawsan siya pagpusil ug naigo kini sa dughan.
Ang kapolisan dali nga midala sa samaran ngadto sa Cebu City Medical Center (CCMC) apan namatay g’yud ang giingon’g kawatan.
Matud sa kapolisan nga human nila mapusili ang suspetsado, ilang nasakmit ang 22 kalibre nga revolver nga duna’y tulo ka bala ug duha ka basiyo. – /RUB) (BANAT NEWS)