CEBU, Philippines – Gipaningkamotan karon sa Cebu Provincial Anti Drug Council (CPADC) nga himoon nga drug-free ang lungsod sa Pilar nga usa sa upat ka lungsod sa Camotes.
Ang usa sa proyekto sa CPADC mao ang pagpangita og usa ka barangay o lungsod sa Sugbo nga madeklarar nga drug-free ug gi-target nila ang lungsod sa Pilar.
Matud ni CPADC executive director Joey Herrera nga ang dapit nga madeklarar nga drug free mao kadto’ng mga lungsod o barangay nga wala g’yuy bisan usa ka drug pusher o user.
Si Herrera miingon nga atol sa drug testing nga ilang gipahigayon didto sa Pilar, usa ka island-municipality, ilang natino nga wala'y bisan usa sa mga empleyado sa munisipyo nga nipositibo sa drugas.
Nahinabi ni Herrera si Mayor Jesus Fernandez mahitungod sa iyang plano ug ang mayor miingon nga mura’g lisud kaayo ang pagsiguro nga sa usa ka dapit wala g’yuy drug pusher ug user. Si Fernandez sa wala pa mahimo’ng mayor maoy provincial health officer sa Sugbo.
Ang programa usa ka proyekto sa CPADC isip kabahin sa padayon nga pagsumpo sa pagamit ug pag-abuso sa ginadiling drugas sa kalungsoran. – /RUB) (BANAT NEWS)