CEBU, Philippines – Patay ang anak sa kanhi hepe sa Compostela Police Station ug karon hepe sa Provincial Tactical Operations Command (PTOC) human kini gipusil sa iyang barkada niadtong nakalabay nga gabii diha sa Sitio Dajo, Barangay Inayawan, dakbayan sa Sugbo.
Ang biktima naila nga si Jayford Romanillos, anak ni Senior Inspector Samuel Romanillos nga nagpuyo sa Sitio Lumboy sa mao’ng barangay.
Nadakpan na hinuon ang gitudlo nga mipatay sa biktima nga si Vince Winard Villareal, alyas Amang, nagpuyo ra ‘sab sa maong barangay human sa gihimong follow-up operation sa kapulisan didto sa ilang panimalay.
Gawas ni Villareal, apil sa gipangita si alyas Adoy ug laing lalaki nga wala pa mailhi ang pangalan.
Matud pa ni Police Officer 1 Merlo Laborte sa Homicide Section sa Cebu City Police Office nga nahinabi sa Banat News, sakop sa managlahing grupo apan managhigala ang duha.
Sumala pa ni Laborte nga atol sa ilang pagsikop sa suspetsado didto ra kini sa ilang balay natulog ug wala gayod moangkon sa maong pasangil. “Dili g’yud moangkon, dili daw siya mipusil, pero ang mga nakuha nato nga impormasyon base sa mga testigos siya ang gitudlo, wala ma’y lain nga alyas Amang diha,” matud pa ni Laborte.
Samtang si PO1 John Erick Samosa nga nahinabi sa Banat News miingon nga sa ilang imbestigasyon ilang nasayran nga kuyog ang biktima ug ang suspetsado apil ang ilang uban nga barkada nag-estambay sa nahitaboan.
Gikatahong kalit nga nagkalalis ang duruha ug misangpot sa pagpamusil sa suspetsado ni Romanillos.
Dili mominos sa tulo ka igo sa likod ang naangkon sa biktima ug ang usa ka bala gituohang milapos sa dughan niini nga mao’y hinungdan sa iyang kamatayon.
Sa pagrekisa sa kapulisan sa lawas sa biktima nakuha sa iyang hawakan ang usa ka .38 snub nose revolver nga duna’y tulo ka bala ug usa ka kutsilyo.
Hangtod karon blangko pa ang kapulisan sa motibo sa krimen samtang gipaubos sa paraffin test ang suspek. – /EIM) (BANAT NEWS)