CEBU, Philippines - Grabeng naangol ang duha ka motorista uban sa ilang backrider dihang ang motorsiklo nga ilang giluwanan kalit lang nagkasungag sa ilang paghidangat sa dalan M.C. Briones sa barangay Ibabao, dakbayan sa Mandaue alas 3 pasado ang takna kagahapon sa kadlawon.
Ang mga naangol mao sila si Llendon Cabellino, 25 ug Bobby Magulay nga taga barangay Cambaro; Ray Bonconel Mayang, 28 ug Jessa Bandolon, 21 nga taga Upper Tabok, dakbayan sa Mandaue.
Si PO2 Subdane Tradio, imbestigador sa traffic division sa Mandaue City Police Office (MCPO), miingon nga gikan sa lungsod sa Consolacion ang motorsiklo nga gidala ni Cabellino ug backrider nga si Magulay. Samtang ang motorsiklo nga gidala ni Mayang nga backrider usab niya si Bandolon gikan sa dakbayan sa Sugbo ug paingon sa norte apan dihang nahidangat sila sa ilawom nga bahin sa Maguikay flyover habig na sa barangay Ibabao, kalit lang nagkasungag.
Nangalamba ang mga biktima sa karsada hinungdan sa grabeng kadaut sa ilang kalawasan ug dali nga gidala sa tambalanan. (BANAT NEWS)