CEBU, Philippines -Sugaton og halad nga sayaw sa Sinulog sa mga tinun-an ug kabataan sa Mandaue ang imahen ni Senyor Santo Niño atol sa “Traslacion” karong Enero 17, apan dili pa kini ang tinuig nga “Panagtagbo Festival.”
Si Luela Cabañero, tourism officer sa dakbayan miingon nga kaniadto sugaton sa Panagtagbo Festival ang Traslacion sa Senyor Sto. Niño gikan sa Cebu City padung sa Mandaue City.
Apan nadesisyonan sa kadagkoan sa Mandaue City nga isibog sa bulan sa Mayo ang Panagtagbo Festival aron mas mahatagan kini og dakong pagtagad tungod sa kadaghan sa mga kalihokan kun magpista ang Senyor Sto. Niño sa Cebu City.
Dili hinuon mawala ang naandang pagabi-abi sa dakbayan sa Mandaue ngadto sa mga balikbayan nga Mandauehanon nga mituyo pagpauli alang sa pista sa Senyor Santo Niño.
Ang imahen sa Balaang Bata uban sa Imahen sa Birhen sa Guadalupe dad-on sa dakbayan sa Mandaue pinaagi sa Traslacion.
Si Mayor Michael Rama sa Cebu City uban sa kaparian maoy mangulo sa pagdala sa maong imahen padung sa utlanan sa Mandaue City ug Cebu City.
Dawaton ang mga imahen ni Mandaue City Mayor Jonas Cortes ug kaparian sa National Shrine of Saint Joseph alang sa vigil sa mga debotos sa Mandaue ug iprosisyon kini sayo sa kaadlawon ngadto sa Ouano Wharf sa Barangay Looc alang sa Fluvial Procession pabalik sa Cebu City. (Romeo T. Limpangog/EIM)(BANAT NEWS)