CEBU, Philippines – Ang mga turista nga mosalmot sa Suroy-Suroy sa habagatang Sugbo dili na mohapit sa lungsod sa Alcantara kay ang mga opisyal sa mao nga dapit mibalibad na nga dili sila moapil sa mao nga kalihukan. Matud ni Bise Gobernador Agnes Magpale nga mibalibad na ang mga opisyal sa Alcantara pagsalmot sa Suroy-Suroy Sugbo tungod kay dako kaayo ang kadaot nga nahiagoman sa ilang lungsod sa bagyo’ng Seniang. Ang Alcantara usa gani sa upat ka lungsod sa Sugbo nga hatagan og ‘tag P300 mil sa kagamhanan sa dakbayan sa Sugbo aron magamit sa ilang relief operations.
Ang tulo ka laing mga lungsod mao ang Sibonga, Dumanjug ug Ronda. Ang Ronda maoy nagrabehan diin adunay siyam ka tawo ang namatay diha’ng naanod ang ilang kabalayan sa kusog nga baha. Ang sikat nga board walk sa Alcantara mao unta ang suroyon sa mga turista apan nagusbat kini pag-ayo tungod sa bagyo.
Kapin na sa 80 ka tawo ang nagparehistro nga mosalmot sa Suroy-Suroy Sugbo ug 14 ka lungsod sa habagatang bahin sa probinsya ang suroyon sa mga turista.
Naglaom si Magpale nga mahuman na unta sa Department of Public Works and Highways (DPWH) ang paghimo og temporaryo nga steel bridge sa Dumlog, Sibonga aron makaagi ang mga bus nga sakyan sa mga turista pag-adto sa habagatan. Ang Suroy-Suroy sa habagatang Sugbo magsugod karong umaabot Enero 21 hangtod Enero 24. – /RUB) (BANAT NEWS)