CEBU, Philippines – Ang Walk with Jesus ang nagtimaan sa pagbukas sa mga kalihukan sa Fiesta Señor 2015 gikan sa Fuente Osmeña Circle ngadto na sa Basilica Minore del Sto. Niño.
Matag tuig ipahigayon ang Walk with Jesus isip pagpakita’g sakripisyo pinaagi sa pagmata og sayo ug paglakaw samtang nag-ampo isip usab pasalamat sa tanang grasya nga nadawat sa mga niaging katuigan.
Kadtong dili makasalmot tungod sa kakulian sama sa balatian, mahimong maminaw sa radyo gikan sa ilang panimalay aron sa gihapon makaapil sa pag-ampo bisan sa ilang kahimtang.
Inig human sa prosesyon nga salmutan sa liboan ka mga deboto mo-uwan man o dili, ipahigayon ang usa ka Santos nga Misa sulod sa Basilica complex nga panguluhan sa rector nga si Fr. Jonas Mejares kinsa naila usab sa bansag nga "singing priest."
Ang maong misa mao ang pagsugod sa siyam ka adlaw nga nobenaryo diin 11 ka misa ang ipahigayon sugod sa alas 4 sa kaadlawon.
Kini sundan sa alas 5:30 sa buntag, alas 7, alas 8:30, alas 10, alas 11:30, ala 1 sa hapon, alas 2:30 sa hapon, alas 4 sa hapon, alas 5:30, ug alas 7 sa gabii. – /GMR) (BANAT NEWS)