CEBU, Philippines – Usa ka gipasanginlang level 2 drug pusher ang nadakpan sa mga sakop sa City Intelligence Branch (CIB) sa Cebu City Police Office ug nakuhaan og P361,000 nga kantidad sa drugas diha sa Barangay Pit-os dakbayan sa Sugbo.
Ang nasikop atol sa buy-bust operation naila nga si Neil Mabano, 35, ug nagpuyo sa mao’ng lugar human kini mibaligya og shabu sa usa ka poseur buyer sa kapolisan.
Nakuha kang Mabano ang unom ka medium size, 23 ka gagmay ka pakete nga may sud nga gituohang drugas ug cash nga P2, 800 nga gituohang kinitaan niini sa iyang ilegal nga kalihokan.
Gawas ni Mabano laing upat ka mga lalaki ang nasikop human nakuhaan og mga drug paraphernalia ug Nubain diha sa maong lugar.
Ang mga nasikop naila nga sila si Harold Sumaylo, 29, Eldred Lopez, 29, Ricky Sayson, 43, nga nakuhaan og tagsa ka Nubain ampoules ug si Aumar Limotan, 27 nga nakuhaan og pito ka linikit nga aluminum foils. Matud pa ni Superintendent Romeo Santander, hepe sa City Intelligence Branch nga nahinabi sa mga tigbalita dunay mitawag kaniya sa telepono ug misumbong sa ilegal nga kalihokan ni Mabano.
Si Mabano gikatahong makabaligya og kapin 200 gramos nga drugas matag semana. – /EIM) (BANAT NEWS)