CEBU, Philippines - Naputos sa samad dinunggaban ug napislat ang ulo sa usa ka electrician human kini gidakdakan og bricks sa iya ra pud kauban sa trabaho diha sa Sitio Zapanta sa Barangay Tejero sa dakbayan sa Sugbo.
Ang namatay naila nga si Roque Espina, 52, nga taga SAYC, Barangay Tejero, samtang ang suspek naila nga si Mark Anthony Rico, 36, nga taga-Villagonzalo I, sa maong barangay.
Base sa imbestigasyon sa kapolisan nga ang duha managkauban sa trabaho apan dugay na nga may pagdumot ang suspek sa biktima.
Matud pa nga gipatrabaho sa usa ka Maidu Sanchez ang biktima ug ang suspek apan samtang nag-instalar og linya sa kuryente ang biktima sa kisame sa balay.
Mikatkat ‘sab sa hagdanan ang suspek ug midiretso og dunggab sa biktima sa iyang likod ug sa liog hinungdan sa pagkatagak sa biktima diha sa ubos.
Matud pa nga mikanaog dayon ang suspek ug giusban pa og dunggab ang biktima diha sa wala nga dughan niini ug pagkahuman mikuha kini og “solid brick” ug gidakdak ngadto sa ulo sa biktima.
Human sa maong hitabo midagan ug mitahan ang suspek ngadto sa barangay tanod nga si Roy Rubic.
Samtang ang biktima daling gidala sa Vicente Sotto Memorial Medical Center apan gideklarar na kini nga dead on arrival.
Nakuha sa kapolisan sa Waterfront Police Station ang kutsilyo nga gigamit sa pagdunggab ug ang brick nga gigamit sa pagdakdak sa ulo sa biktima diha sa crime scene.
Ang imbestigador sa Homicide Section nga si Senior Police Officer 4 Alex Dacua miingon nga “personal grudge” ang motibo sa suspek sa pagpatay sa biktima apan wala pa nila masayri kun unsay sinugdanan niini. (BANAT NEWS)