CEBU, Philippines - Napakgang ang kasadya sa usa ka pamilya dihang usa sa ilang sakop ang kalit lang giduol sa hubog nga lalaki ug gidunggab ala 1 pasado sa pagsugat sa bag-ong tuig sa sitio Intramuros, barangay Poblacion, lungsod sa Cordova.
Si Senior Police Officer 1 Laurencio Wagwag niila sa biktima nga si Hector Babatuan, 41, ug ang suspek mao si Nelson Lumansang, hingkod, nagpuyo sa maong dapit.
Ang biktima nakalitan sa kalit nga pagsulod sa hubog hinungdan nga nakalihay apan natapsingan gyud ang tiyan, paa ug mga bukton sa gidala nga kutsilyo.
Ang suspek dali nga nakasibat human sa hitabo ug wala na naabti sa kapolisan samtang ang biktima ang gidala sa tambalanan. (BANAT NEWS)