CEBU, Philippines – Gikabalak-an nga sa pantalan magsugat sa Bag-ong Tuig ang mga na-stranded nga pasahero nga manguli unta sa tagsatagsa nila ka probinsiya gumikan sa bagyong Seniang.
Sa Pier 1, nagpunsisok ang mga pasahero’ng lokal ug langyaw nga nagpaabot kun kanus-a mohatag og go signal ang Philippine Coast Guard aron pwede na mobiyahe ang mga barko.
Daghan sab ang nagsusi sa mga ticketing office labot sa mga biyahe nga gipangkanselar ug kun mahimo ba nga i-refund ang ilang bayad ug usbon ang schedule sa biyahe.
Dunay ubang pasahero gikan pa sa Manila ug buot unta nga mouli sa ilang probinsiya sa Bohol alang sa Bag-ong Tuig.
Hinuon wala nila gikadismaya sanglit dili man tinuyoan ang nahitabo apan ang ilang reklamo mao ang wala’y insakto’ng kaligoanan ug wala’y matulgan sa pantalan.
Nasayran nga kapin sa tres mil ka pasahero ang nangatanggong sukad pa niadtong adlaw’ng Sabado hangtud kagahapo’ng adlawa human gipangkanselar ang mga biyahe sa barko tungod sa hulga sa bagyo.
Matud ni PCG-7 Commander Weniel Azcuna nga natala sa ilang buhatan ang 32 ka dagkung barko ug pito ka motorbanca sa tibuok rehiyon 7 ang nikanselar sa biyahe.
Awhag ni Azcuna sa mga stranded nga pasahero nga monitoron ang weather bulletin sa PAGASA tungod kay ang ilang ahensiya dili gyud makatugot nga dunay mobiyahe kun dunay storm warning signal. – /GMR) (BANAT NEWS)