CEBU, Philippines – Nag-inom og kape gipusil-patay gawas sa iyang balay didto sa Barangay Mabolo kaniadto’ng Domingo sa kaadlawon apan sa wala pa mamatay nakatug-an pa kini ngadto sa iyang asawa sa ngalan sa mipusil kaniya.
Ang biktima mao si Guillermo Villeran, minyo ug nagpuyo sa maong lugar, samtang gitudlo’ng suspetsado sa krimin mao si Melecio Mondares, alyas Echong.
Si PO1 Joel Zamora sa homicide section sa Cebu City Police Office (CCPO) miingon nga ang asawa sa biktima nga si Marreta misaysay nga samtang naglingkod ang iyang bana gawas sa balay kalit lang miabot ang kriminal ug gipusil kini sa makadaghan nga higayon.
Ang kriminal nagdali nga misibat human pusila makaduha ka higayon ang biktima.
Matud ni Zamora nga samtang sakay sa motorsiklo ang biktima paingon sa tambalanan nakatug-an pa kini sa ngalan sa suspetsado nga mao’y mipusil kaniya ug ila ra kini’ng silingan.
Pakyas ang mga doktor sa pagtabang aron unta maluwas ang biktima tungod sa kadagko sa samad-pinusilan. Si Zamora miingon nga ila pa unta gipangutana ang asawa kun unsa’y hinungdan nga gipusil man sa ilang silingan ang iyang bana, apan wala na kini mohatag pa og impormasyon.
Nagpadayon pa ang imbestigasyon sa kapolisan kabahin sa krimin ug sa pagpangita sa gitumbok nga suspetsado. – /RUB) (BANAT NEWS)