CEBU, Philippines - Gitabangan og dunggab ug kulata sa tulo ka magsuon ang usa ka amahan atubangan sa iyang anak sa sitio San Lower Ponce, Capitol Site, dakbayan sa Sugbo, pipila ka oras human sa pagsugat sa Pasko.
Ang biktima naila nga si Camelo Monares, 52, panday, nagpuyo sa maong lugar samtang ang tulo ka suspek naila nga sila si Jun-jun, Toto ug Bigboy Mendoza, mga hingkod ug nagpuyo ra sa maong lugar. Matud ni PO1 John Errick Samosa sa homicide section sa Cebu City Police Office nga hubog niadtong higayuna ang biktima nga gikalalis sa magsuon atol sa lingaw-lingaw sa Pasko sulod sa basketball court. Dihang nigawas ang magsuon, nisunod ang biktima ug ang anak nga si Cecile ang dali’ng nangita sa iyang amahan.
Mao’y iyang nakita nga gitabangan na sa tulo ka magsuon ang iyang amahan nga gikulata, gibundaka’g bato ug gidunggab. Human sa hitabo dali nga nisibat ang tulo ka magsuon samtang ang anak na ang niibot sa kutsilyo nga nagtaop sa likod sa iyang amahan. Patay na nga nadangat sa Vicente Sotto Memorial Medical Center ang biktima. (BANAT NEWS)