CEBU, Philippines - Naangol ang tulo ka magsuon human pareglahi sa duha ka armadong lalaki sa ilang pagpanaygon sa sitio Lawis, San Roque, dakbayan sa Talisay niadtong kadlawon sa Pasko. Ang mga biktima naila nga sila si BJ Nacor Abaquita, 20, ug mga manghud nga babaye ug lalaki nga nag-edad og 16 ug 15 anyos, nga taga sitio Pier 7, Lagtang, sa maong siyudad.
Sa imbestigasyon sa homicide section sa Talisay City Police Office nga gipangulohan ni PO3 Oliver Ortega nasayran nga paingon na unta mopauli ang mga biktima human nanaygon dihang kalit lang niabot ang upat ka lalaki kinsa ang duha armado og .45 pistol ug .357 revolver.
Kalit lang namusil ang usa sa mga armado tumong sa yuta hinungdan nga mipisik ang mga bato igo sa paa sa mga biktima.
Human sa buto sa armas dali nga mipadagan sa motorsiklo ang amahan sa mga biktima nga si Boby Abaquita Sr.
Tunga-tunga sa iyang dagan, usa sa iyang mga anak ang mitug-an nga nagkadugo na kini ug ang uban sab nakaangkon og bun-og sa paa.
Hinuon luwas na sa delikadong kahimtang ang mga biktima kinsa dali nga gidala sa Vicente Sotto Memorial Medical Center. (BANAT NEWS)