CEBU, Philippines - Mokabat sa P100 mil nga balor sa ginadiling drugas ang nasakmit sa mga sakop sa City Intelligence Branch sa Cebu City Police Office sa gipahigayong buy-bust operation sa V. Rama Avenue siyudad sa Sugbo.
Si Vincent "Towing" Gabutan Gonzales, 27, molupyo sa maong dapit nasikop sa mga sakop sa CIB ug nakuhaa’g duha ka gagmay’ng pakete, duha ka medium size nga pakete nga dunay sud nga gituohang shabu ug 194 ka Nubain ampoules.
Laing nakuha ang upat ka kalibre 45 nga pistola, duha ka caliber .22 revolvers ug cash nga P1,100 nga gituohang halin sa ginadiling drugas.
Ang kapolisan nakadawat og report gikan sa usa ka impormante kabahin sa ilegal nga kalihokan sa suspek hinungdan sa gipahigayon nga buy-bust operation.
Kasamtangan karon nga natanggong si Gonzales sa Cebu City Police Office (CCPO). (BANAT NEWS)