CEBU, Philippines - Wala nakapugong ang ulan sa mga sakop sa San Nicolas Police Station aron ilang bisitahon, panaygonan aron hatagan og regalo ang mga kabus nga mga pamilya ubos sa ilang hurisdiksyon kagahapon sa sayo sa buntag.
Moabot sa unom ka mga pamilya ang nakadawat og gift packs, kinilo nga bugas ug tambal kantidad P2,000 matag usa gikan sa Station 6 sa Cebu City Police Office. Ang maong programa gitawag nga “Pamaskong Handog” gipangulohan sa hepe niini nga si Senior Inspector Chuck Barandog ang midalit og awit sa Pasko ngadto na sa ilang gipangbisita nga mga balay.Human sa pagkanta gisunod gilayon ang pagpanghatag sa mga regalo.Ang mga nakadawat og regalo gikan sa Police Station 6 mao sila si Belen Andong sa Sitio Compound, barangay Calamba; Isabelita Ledesma, sa V. Rama Extension, barangay San Nicolas Proper; Marjorie Maloloy-on, C. Padilla Street, barangay Pahina Central, Charisma Llanto sa Magsaysay Street, barangay Pasil; Rodulfo Igot, A, Borres Street barangay Suba ug Lovella Macaray sa Gen. Gines Street, barangay Sawang Calero.
Si Senior Superintendent Condrad Capa, acting chief sa CCPO ug ang iyang deputy nga si Superintendent Alet Virtucio miuban sa maong kalihokan ug apil sa nanaygon. Ang usa sa nakadawat sa regalo nga si Andong, sa barangay Calamba ang usa sa biktima sa sunog niadtong pipila ka buwan na ang nakalabay ug hangtud karon sa “trapal” lang kini nagpuyo.
“Dako na kaayo ni og tabang sama namo nga pobre kaayo”,sigun pa ni Andong.
Ang kapitan sa Barangay Calamba nga si Ma. Yvonne Cana Feliciano mi-uban ‘sab sa maong kalihokan.
Si Capa sa iyang bahin mipasalamat sa gihimo sa hepe sa maong buhatan ug miingon nga ang maong kalihokan mao’y usa sa mga maayong buhaton sa mga polis ilabi na karong panahon sa Pasko. (Jojo C. Ugdol/EIM)(BANAT NEWS)