CEBU, Philippines – Nasikop ang duha ka gidudahang tulisan nga buot unta’ng motulis sa drayber sa habal-habal nga ilang gisakyan sa sitio Tigbao, Talamban, siyudad sa Sugbo niadtong Lunes sa kaadlawon. Ang biktimahon unta sa gidudahang mga tulisan mao si Van Cresilu Fuentes.
Ang mga nadakpan nailhan nga sila si Joel Obejero alyas Celso, 31-anyos, taga Aliwanay, Balamban ug si Gemwel Guaca, 31-anyos, taga Bacayan, siyudad sa Sugbo. Base sa taho sa kapolisan nga ang mga suspek buot untang magpahatud kang Fuentes paingon sa Talamban proper.
Sigun pa ni PO2 Jud Jacquez, desk officer sa Talamban Police Station, nga nakadungog ang drayber sa panag-estorya sa duha ka suspek nga naglambigit og kwarta apan pagtan-aw sa iyang side mirror, nakit-an niya nga nagkupot na og pusil ang usa sa mga suspek.
"Nakadungog daw siya nga niana ang usa sa mga suspek nga ‘ikaw la'y kupot aning cellphone bay’ apan nakita niya sa side mirror nga pusil diay ang gitunol," pahayag ni Jacquez.
Dihang nabatyagan sa biktima nga basin tulis ang tuyo sa duha ug siya ang target, iya’ng gituyo nga ipatumba ang motor samtang gadagan aron mapakyas ang duha.
Atol nga dunay kapolisan nga nag-checkpoint sa maong dapit nga gipangulohan ni Police Insp. Roy Manguilimotan hinungdan nga nasikop ang duha ka suspek ug nakuhaan og .22 caliber revolver nga adunay duha ka bala.
Nasuta sab sa dugang imbestigasyon sa kapolisan nga nahaum sa cartographic sketch ang panagway ni Obejero nga usa sa mga suspek sa pagpangawat sa usa ka gasolinahan sa lungsod sa Balamban pipila na ka buwan ang milabay. – /GMR) (BANAT NEWS)