CEBU, Philippines – Mokabat sa P7.4 milyones ang gibilin nga danyos sa 21 ka sunog nga nahitabo sa dakbayan sa Mandaue sukad Enero ning tuiga.
Kini ang gibutyag ni Senior Fire Officer 3 Roy Garcia, chief of operation ug chief investigator sa Bureau of Fire Protection (BFP) sa dakbayan, base sa natala sa ilang buhatan.
Labing ulahing sunog nga nahitabo sa dakbayan karong tuiga nahitabo sa Mahiga Creek sa sitio Upper Mahusay, Subangdaku niadtong Disyembre 4.
Maoy naugdaw sa sunog ang 30 ka panimalay nga pulos ginama sa light materials ug nagbilin kini og danyos nga P300 mil.
Ang kapin sa 100 ka pamilya maoy nahimong biktima sa maong sunog nga naglakip kanila ang mga tag-iya ug sakop sa pamilya ug mga nag-abang nga mga trabahante.
Dugang mga biktima mao ang nagpuyo daplin sa Mahiga Creek nga gikatakda na nga demolison sa kagamhanan.
Ang labing dakung sunog karong tuiga sa dakbayan mao ang pagkaugdaw sa bodega sa surplus sa barangay Casuntingan nga nagbilin og danyos nga mokabat sa P2.5 milyones niadtong Marso 18. – /GMR) (BANAT NEWS)