CEBU, Philippines - Wala’y suwerte ang usa ka lalaki nga nisuway og kawat sa gi-parking nga motorsiklo atubangan sa panimalay sa biktima human nasakpi sa barangay Poog, dakbayan sa Toledo.
Usa ka Jonathan Palicte, 28, taga barangay Carmen sa maong dakbayan ang nisuway pagkawat sa motorsiklo sa magtiayun nga Jumar ug Rowena Pardillo.
Ang biktima gikan nitan-aw sa peryahan sa maong lugar nga magsaulog sa piyesta sakay sa iyang motorsiklo apan nipauli kini aron mokaon ug gi-parking sa biktima ang motorsiklo sa gawas sa ilang panimalay.
Samtang nagbarug ug nanigarilyo ang biktima sa balkunahe sa ilang balay human nikaon, nasigpatan niini ang usa ka lalaki nga hinay nga nikamang paingon sa iyang motorsiklo ug buot unta nga mokawat niini.
Dali kini’ng nikanaug ug nipunit og bato ang biktima ug gihapak ang suspek kinsa maayong pagkaigo sa nawong sa suspek hinungdan nga nakaangkon og samad ug nalipong. Gisikop ang suspek pinaagi sa citizen’s arrest ug gidala sa Police Community Precinct 1 sa barangay Lutopan. (Raymond Abarcas/GMR)(BANAT NEWS)