CEBU, Philippines – Human sa paglabay sa bagyong Ruby, gibuksan na pagbalik ang kwarenta ka mga airports sa nasud sumala pa sa Civil Aviation Authority of the Philippines (CAAP).
Lakip sa mga tugpahanan nga abli na sa commercial flights mao ang mga tugpahanan sa Tacloban ug Borongan.
Sumala pa sa report sa Interaksyon, ang CAAP mipasalig nga luwas gamiton ang Tacloban.
Mipagawas na usab og notice to airmen (Notam) nga nagmando nga abli na sa tanang matang sa abyon sibilyan man o militar ang maong tugpahanan.
Niadtong Domingo, ang CAAP mipagawas og Notam nga bugtong military aircraft lang maoy tugotang makagamit sa maong tugpahanan nunot sa pagpanghatud sa mga relief goods alang sa mga biktima sa bagyo.
Na-repair na usab ang naguba nga atop sa Tacloban airport pre-departure area. Nasayran nga ginagmay ra ang gibiling danyos sa tanang mga tugpahanan nga naagian sa bagyong Ruby.
Samtang ang Borongan airport, nagsugod na og dawat og mga abyon lakip ang C-130 transport aircraft sa militar nga naghatud og relief goods sumala pa ni Armed Forces of the Philippines (AFP) chief-of-staff Gen. Gregorio Pio Catapang. (Gikan sa Wires/EIM) (BANAT NEWS)