CEBU, Philippines – Nanawagan og dugang volunteers ang Department of Social Welfare and Development alang sa pag-repack sa mga relief goods.
Liboan na ka food packs ang nadispatsar sa DSWD-7 sa mga lugar nga naapektohan sa bagyong Ruby sa amihanang bahin sa Sugbo ug sa Eastern Visayas.
Ang maong relief supplies nahimo pinaagi sa tabang sa 854 ka volunteers.
Samtang gilimitahan na ang mga volunteers sa pagkuha og hulagway sa mga relief goods aron malikayan ang kontrobersiya sa bagyong Yolanda.
Kadto lang mga sakop sa media o organisasyon nga mohimo’g mga legal nga documentation sa gihimong repacking ang tugutan nga makakuha og hulagway.
Sagad sa mga volunteers mga tinun-an, mga sakop sa nagkadaiyang organisasyon, religious group ug uban pa.
Samtang awhag sa DSWD-7 sa mga buot modonar nga mas gikinahanglan ang pagkaon ug tubig.
Dili sila modawat og mga hinabang nga anaa sulod sa botelya o sa bisan unsa’ng mabuak nga sudlanan, mga sinena ug mga gatas. – /GMR) (BANAT NEWS)