CEBU, Philippines - Nagpakitabang sa Fuente Police Station ang usa ka langyaw nga gikawatan og kwarta sa usa ka Pinay nga gikauban sa usa ka hotel sa may dalan P. Rodriquez Street, Capitol Site, dakbayan sa Sugbo niadtong nakalabay nga kadlawon.
Ang langyaw naila nga si Farry Ciaran, 28, lumad nga taga Ireland ug temporary nga nagpuyo sa usa ka hotel.
Nasayran nga pasado ala-una sa kadlawon naka-ila sa langyaw ang 25-anyos nga Pinay nga si Emily Javier sa usa ka disco bar sa Mango Square.
Human sa pipila ka minutos, nagkasabot ang duha nga magkuyog sa gipuy-an nga hotel sa langyaw. Human sa ilang kumbate sa kama, nisulod ang langyaw sa kasilyas apan mao na lang ang nabantayan nga nawala na ang iyang pitaka nga may sulod P6 mil.
Matud sa langyaw nga iya sab nabantayan nga nagdali-dali unta pagpanghipos ang Pinay sa iyang mga gamit ug paingon na nga mogawas apan iya napugngan.
Gumikan sa pagduda sa langyaw nga siya gikawatan, nagtawag siya og polis.
Matud ni SPO1 Allan Vallejo, desk officer sa Fuente Police, nga ang babaye hugot nga nihimakak sa pasangil.
Sa pagsubay sa kapolisan, matud ni Vallejo nga P4 na lang ang ilang nakuha gikan sa babaye.
Karong adlawa gipaabot sa kapolisan ang pagbalik sa langyaw aron masayran kung mopasaka ba og kaso batok sa babaye nga kasamtangang gitanggong sa Fuente Police detention cell. (BANAT NEWS)