CEBU, Philippines - Nabun-og ang nanulis sa mga pasahero sa public utility jeepney human tabangi og kulata sa mga istambay sa lugar nga iyang gitagoan.
Tulo ka tulisan ang nisakay og 21B nga rota sa PUJ ug naniun og armas sa mga pasahero niadtong Sabado sa MJ Cuenco Avenue, T. Padilla, siyudad sa Sugbo. Human sa pagpanulis, dali nga miresponde ang Mobile Patrol Group ug ang kapolisan sa Parian Police Station. Gisuhid ang suok nga bahin sa maong lugar ug nadakpan ang usa sa mga nanulis nga naila sa pangalan nga Rommel Cuico, 30-anyos, nga taga sitio Villagonzalo II, Tejero.
Dihang nadakpan ang suspek, ang mga istambay sa lugar ang wala kapugong sa ilang gibati ug naputos sa sumbag ang tulisan apan gibadlong sa kapolisan. Ang suspek hugtanong mihimakak nga siya ang nanulis ug wala siya nasayud kun nganong kalit siya gidakop. Usa sa biktima nga si Rosalinda Mangyao positibo nga mitudlo sa suspek nga maoy nanulis kanila. Nakuha sa posesyon sa suspek ang usa ka .38 kalibre nga armas ug usa ka gamay’ng pakete sa gituohang shabu. (BANAT NEWS)