CEBU, Philippines - Usa ang namatay ug duha ang kritikal nga kahimtang diha’ng ang habal-habal nga ilang gisakyan kalit lang nalimbuwad sa karsada ug nalagpot sila ngadto sa usa ka Isuzu forwarder sa dalan national sa Sitio Catadman, Sabang, Danao kagahapon sa buntag.
Ang namatay mao si Cherry Mae Macrojon, 24, dalaga ug ang kritikal mao si Carin Temple, 20, dalaga ug kauban nga production worker sa pabrika nga pulos lumad nga taga Misamis Oriental. Ang laing kritikal mao si Mark Carambo Ave, 23, taga Maslog, Danao nga maoy nagmaneho sa motorsiklo nga habal-habal. Wala magsul-ob og crash helmet ang mga biktima.
Si SPO1 Reynante Manulat, imbestigador sa traffic section sa Danao City Police Station, miingon nga nagdagan paingon sa barangay Poblacion ang habal-habal nga gimaneho ni Ave nga nagsunod sa usa ka traysikol.
Si Ave nga nagmaneho sa habal-habal mi-overtake unta sa traysikol nga gimaneho ni Renato Duterte, 64, taga Barangay Poblacion, Danao apan nasugatan niya ang Isuzu forwarder nga gimaneho ni Retchie Gubalane, 34, taga Sitio Panas, Barangay Tuburan Sur, Danao
Matud ni SPO1 Manulat nga nasangit ang manobela sa motor ngadto sa traysikol nga gimaneho ni Duterte ug maoy hinungdan nga nawad-an kini sa ilang pagpanimbang ug nalamba ngadto sa karsada.
Gumikan sa kusog nga impact sa ilang pagkalamba ang duha ka pasahero nga angkas sa motor nalagpot ngadto sa tapaludo sa Isuzu nga sakyanan ug maoy hinungdan sa grabe’ng kadaut sa ilang mga ulo. (BANAT NEWS)