CEBU, Philippines - Usa ka polis ang gipusil patay sa wala mailhing lalaki atubangan sa iyang motorparts shop sa Sitio Kabaloy, Barangay Pajac dakbayan sa Lapu-Lapu City.
Sumala pa ni Police Officer 3 Lydo Pinos sa Lapu-Lapu City Police Office-Homicide Section ang biktima mao si PO1 Romel Gilig, 33, Supply Officer sa LCPO ug residente sa Sitio Bukid-Bukid sa nahisgutang barangay.
Base sa imbestigasyon, si Gilig ug ang iyang mekaniko nga si Mark Lomongsod, 24, padung na manghipos aron manirado dihang nahitabo ang pagpamusil.
Matud pa nga napangutan-an pa ni Lomongsod ang nag-inusarang gunman nga nakit-an niining nagpahipi duol sa tindahan, apan giingong mitubag lang kini nga nagpaabot kini og masakyang traysikol.
Apan dihang gisusi ni Lomongsod ang acytelene hose nakadungog na lang siya og buto sa armas ug sa iyang pagsusi sa shop nahapla na sa duol sa iyang motorsiklo si Gilig. Ang igsuon ni Gilig nga si Alex, 27, ug Lumongsod nagtinabangay pagdala sa biktima sa tambalanan apan patay na kini. Ang shop sa biktima niadto pa lang Martes nagsugod og paninda.
Nasayran usab nga ang 8-anyos nga anak sa biktima nga bag-o pang nauli gikan sa eskuylahan gikatahong nakakita sa pagpamusil. Way nahibaw-ang kontra ang biktima diha sa maong dapit. (BANAT NEWS)