CEBU, Philippines - Daghang pakete sa shabu ang nasakmit sa kapolisan atol sa buwag nila nga anti-drugs operations sa dakbayan sa Lapu-Lapu ug Mandaue kaniadtong Martes.
Mga sakop sa Lapu-Lapu City Police Office (LCPO) Intelligence Branch nga gipangulohan ni Senior Inspector Rogelio Pineda misakmit og 20 ka pakete’ng shabu diha nga nadakpan nila ang duha ka suspetsado nga pushers sa Barangay Gun-ob.
Si Santos Geralla, 44, nakuhaan og usa ka gamay’ng pakete sa shabu nga gibaligya niya sa usa ka police poseur buyer. Siyam usab ka pakete nga shabu ang nakuha gikan ni Geralla diha nga siya girekisa. Ang iyang kauban nga si Marlon Arnado nakuhaan usab og 10 ka gagmay’ng pakete sa shabu ug ang P200 nga marked money kay siya ang midawat sa kuwarta gikan sa poseur buyer.
Nasakmitan usab og mga drug paraphernalia ang duha ka mga suspetsado.
Sa laing bahin, nasakmit usab sa kapolisan ang 15 ka pakete’ng shabu ug mga drugs paraphernalia gikan sa usa ka pusher nga babaye nga si Jenny Geredese nga nadakpan atol sa buy-bust operation sa Barangay Mantuyong, Mandaue.
Si Senior Inspector Jimmy Portes, hepe sa Presinto 1 sa Mandaue City Police Office (MCPO), maoy nangulo sa buy-bust operation nga misangpot sa pagkasikop sa 44-anyos nga si Geredese, minyo nga taga Mantuyong.
Si PO2 Hesson Flores miingon nga si Geredese anaa sa ilang listahan sa mga nagpayuhot og gidili nga drugas. Kapin sa duha ka semana ang ilang pagpaniid sa ilegal nga kalihukan ni Geredese. Pagrekisa ni Geredese human sa iyang pagsikop nakuhaan na usab siya og dugang 13 ka pakete’ng shabu ug mga drugs paraphernalia. (BANAT NEWS)