CEBU, Philippines – Natapsingan sa bala ang usa ka parking attendant gikan sa gituohang duha ka wala mailhing suspek nga nag-motorsiklo sa Manuel L. Quezon Highway, Pajo, dakbayan sa Lapu-Lapu kagahapon sa alas 12:05 sa buntag. Si PO2 Joseph Rouel Cutanda sa Lapu-Lapu City Police Office niila sa biktima nga si Jonas Flores, 30, taga sitio Capricorn, Pajo, ug tigbantay sa mga mo-parking nga mga sakyanan sa Starzan Bar. Matud sa biktima, padulong siya mopalit og sigarilyo dihang kalit siya nakadungog og buto sa pusil ug sa iyang paglingi kalit siya gitionan og pusil sa usa sa mga suspek.
Si Flores nidagan palayo apan gigukod sa mga suspek ug napusilan sa makadaghang higayun ug nakaangkon og samad sa tiil.
Gidala si Flores sa Lapu-Lapu City District Hospital ug gibalhin sa Vicente Sotto Memorial Medical Center samtang nakaikyas ang mga suspek. – /GMR) (BANAT NEWS)