CEBU, Philippines - Niluwat og mga pahimangno ngadto sa publiko si Cebu City Mayor Michael Rama ug ang kapolisan alang sa hapsay nga pagsaulog sa Pasko.
Usa niini ang pagdaginot sa kuryente ug paggamit sa dekalidad nga Christmas lights.
Gidili usab ang pagbutang og mga mahalong Christmas decors sa gawas sa balay aron malikay sa mga kawatan. Magbantay usab sa mga magpaka-aron ingnon nga manaygon apan mga kawatan ug mga manglungkabay.
Ipa-report usab ni Rama sa duol nga police stations ang mga sobrang langasan nga manaygonay.
Matud usab ni Insp. Luz Langbid, ang deputy chief sa Police Community Relations (PCR) sa Cebu City Police Office (CCPO), nga dili gyud malikayan nga dunay mga badlungon panahon sa Pasko. Usa sa pahimangno sa kapolisan nga kinahanglan gyud seguraduhon nga naka-kandado ang panimalay kung molakaw ug hipuson ang mga mahalon nga butang nga anaa sa gawas sa balay. Magpahibalo usab sa silingan kung molakaw aron makabantay sa balay kung may molungkab. Sa mga manuroy sama sa mall, likayan sab ang pagsuot ug pagdala sa mga mahalon nga mga butang nga makaagni sa mga kawatan. Ang gagmay nga bata nga kuyog kinahanglan sab nga butangan og “tag” ug ibutang ang contact number sa ginikanan nga dali nga matawagan kung mawala.
Kinahanglang sa hayag ug dunay guwardiya nga Automated Teller Machine (ATM) ang kuhaan og kwarta. Samtang ang deputy director sa CCPO, Supt. Alet Virtucio, mitug-an nga dunay kausaban sa “deployment” sa mga sakop karong panahona.
Pahugtan pa nila ang mga checkpoint palibot sa dakbayan. Usa sa hatagan og pagtagad sa kapolisan ang mga lugar nga magdasok ang mga tawo diin posibleng mo-ipon ang mga badlungon nga gustong mopahimulos sa panahon.
Giangkon ni Virtucio nga panahon sa Pasko mosaka sab ang krimen sa dakbayan. (BANAT NEWS)