CEBU, Philippines – Patay ang usa ka 36-anyos nga lalaki human pusila sa wala pa mailhing mamumuno gikan nitambong og birthday party sa ilang silingan sa bukirang bahin sa sitio Hagimit, Adlaon, dakbayan sa Sugbo niadtong nakalabay nga gabii.
Ang biktima naila nga si Jovely Arcayan, minyo ug nagpuyo sa maong lugar. Matud ni SPO1 Rommel Bancog nga hangtud karon blangko pa sila kun kinsa ang gunman.
Sumala pa ni Bancog nga kauban ni Arcayan nga niuli niadtong orasa ang duha niya ka silingan kinsa wala sad nakakita sa namusil gumikan sa kangitngit sa lugar. Ang biktima kinsa naulahi sa pagpanglakaw naigo sa ulo ug buko-buko hinungdan nga nakabsan sa iyang kinabuhi.
Samtang kritikal ang kahimtang sa 45-anyos nga sidewalk vendor human gipusil samtang natulog kilid sa dalan sa may 13th Avenue, Tejero, kagahapon sa buntag. Ang biktima naila nga si Joseph Tangpos, lumad nga taga Cubacub, dakbayan sa Mandaue.
Sa impormasyon nga nahipos sa kapolisan nga may gikaaway nga grupo sa mga batan-on ang biktima sa nakalabay nga gabii nga nisangpot sa sinukmagay. Duda si Bancog nga posibleng panimawos ang motibo sa pagpamusil.
Sa lungsod sa Barili, daling nasikop ang usa “watch man” nga nipusil sa iyang gikalalis nga 29-anyos nga lalaki sa barangay Poblacion.
Ang dinakpan naila nga si Wilmer Napoles, watchman sa Mantayupan Falls ug lumad nga taga Campangga sa maong lungsod.
Ang biktima naila nga si Camelo Aguilar, nagpuyo sa barangay Giloctog sa maong lungsod.
Igo sa nagkadaiyang parte sa lawas ang naangkon ni Aguilar hinungdan nga kini nakabsan sa iyang kinabuhi. Matud ni Insp. Julius Ompad, hepe sa Barili Police, nga ilang nasikop si Napoles pasado alas 11 sa buntag kagahapong adlawa human nga dunay nakatug-an nga didto ra kini nagpundo sa iyang gitrabahoan. Kasong murder ang plano’ng ipasaka sa kapolisan batok ni Napoles kinsa gipaslak na sa Barili Police Station. – /GMR) (BANAT NEWS)