CEBU, Philippines - Gipaslak sa karsel sa San Remigio Police Station ang 19-anyos nga mamaligya-ay og DVD human nangumot sa dughan ug sampot sa 13-anyos nga ang amahan usa ka polis.
Ang insidente nahitabo sa barangay Poblacion sa maong lungsod niadtong nakalabay nga buntag.
Ang suspek naila nga si Mamari Farouk Truman, taga Mantuyong, dakbayan sa Mandaue samtang ang biktima lumad nga taga dakbayan sa Bogo ug nagtungha sa maong lungsod.
Ang duha kauban nga sakay sa traysikol dihang nahitabo ang insidente.
Matud ni PO2 Reno Inso sa San Remigio Police ang maestra sa 13-anyos mao’y nipahibalo sa amahan nga polis sa panghitabo sa dihang nag- sige na lang kini og hilak.
Nasikop ang suspek sa Hagnaya wharf samtang naninda og DVD.
Sulod sa bilanggoan naghinuktok ang dinakpan nga gipasakaan na og kasong Act of Lasciviousness. (BANAT NEWS)