CEBU, Philippines - Usa ka inahan ang gipaslak sa Mabolo Police detention cell human nasakpan sa kapulisan nga migamit og peke nga birth certificate nga nag-ingong minor de edad ang iyang anak nga nasikop tungod sa pagpangawat.
Ang nasikop naila nga si Marivic Anoya, 46, nga taga Ermita Proper, Barangay Ermita ning dakbayan sa Sugbo. Matud pa ni Senior Inspector Hartzel Bellido ang hepe sa Mabolo Police Station nga nahinabi sa Banat News, nasikop ang anak nga babaye ni Anoya sa kaso’ng theft. Ang inahan miadto sa ilang buhatan ug nagdala og usa ka birth certificate aron unta ipatoo sa mga polis nga usa ka minor de edad ang iyang anak aron kini makagawas.
Apan wa masayod ang inahan nga gihinabi na sa kapulisan ang anak niini nga miangkon sab nga dili na kini minor.
“Permiro miingon ang iyang anak nga minor siya, but kadugayan og pangutana miangkon siya nga dili na siya minor, tayming kaayo nga miabot ang mama nga nagdala sa birth certificate,” matud pa ni Bellido. sa interogasyon sa kapulisan ilang nasakpan nga duna’y daghang mga impormasyon nga wala matubag sa inahan ug misamot ang iyang pagduda nga peke ang dala niini nga dokumento.
Aron pagsiguro, gipasubay sa kapulisan sa Civil Registrar ang dala ni Anoya nga birth certificate ug nasuta nga peke ang dala nga dokumento sa inahan. Sa plano sa inahan nga moluwas unta sa iyang anak, kini na hinuon ang gipaslak sa kapulisan, samtang ang iyang anak ang nakagawas sa bilanggoan human nga wala na sab mupadayon pagreklamo ang nabiktima niini. Kasong falsification of public documents ang atubangon ni Anoya. (BANAT NEWS)