CEBU, Philippines - Duha ka babaye ang nalandig sa tambalanan human nabiktima sa pagpangdunggab sa ilang mga bana ug ka live-in partner sa managlahing insidente nga nahitabo sa dakbayan ug probinsiya sa Sugbo. Ang hinungdan selos.
Sa dakbayan sa Sugbo nalandig sa tambalanan ang usa ka 25-anyos nga babaye human kini gidunggab sa iyang 29- anyos nga bana tungod sa selos kay nagduda nga duna’y laing lalaki ang iyang asawa, didto sa Nivel Hills.
Sumala pa ni Police Officer 1 Reoful Adalim sa Homicide Section sa Cebu City Police Office nga nahinabi sa Banat News kini miingon nga nagkalalis ang magtiayon tungod sa nasakpang text sa cellphone sa babaye nga gituohan sa bana nga laing lalaki sa iyang asawa. Atol sa tinubagay sa duha, kalit mikuha og kutsilyo ang bana ug gidunggab sa tiyan sa iyang asawa hinungdan sa paglinayogay sa duha nga miresulta sa diriyot pagkaputol sa mga tudlo sa biktima.
Apan nangayo na og pakitabang ang asawa sa ilang silingan human nga nakita niini nga nagdunggab sa iyang kaugalingon ang iyang bana. Ang magtiayon daling gidala sa Miller Sanitarium Hospital ug luwas na ang kahimtang.
Samtang sa lungsod sa San Francisco, usa ka 23-anyos nga babaye ang nalandig sa tambalanan human gidunggab sa iyang 30- anyos nga kaipon diha sa Sitio Malbago, Barangay Union sa maong lungsod.
Sa imbestigasyon sa kapulisan sa maong lungsod nga gipangunahan ni PO2 Zeusito Velasco, nagduda ang lalaki nga dunay laing karelasyon ang biktima.
Ang biktima gidunggab sa suspek sa tiyan ug sa paa ug daling gitabang pagdala sa Ricardo Maningo District Hospital.Ang suspek nasikop sa kapulisan.
Nasayran sa Banat News nga ang duha ka mga babayeng biktima pulos mipadayag nga di na mopasaka og kaso sa ilang mga pares. (BANAT NEWS)