CEBU, Philippines – Gipasakaan na og kaso ang duha ka magsuon nga gitudlong mihakot sa sulod sa usa ka tindahan diha sa Poblacion, Pardo ning dakbayan sa Sugbo.
Ang duha mao sila si Jehkir, 23, ug Edgar Dumpang, 24, nga taga Sitio Lower Suran, Kinasang-an, samtang ang ilang biktima mao si Edith Idano, 54,sa maong dapit. Sumala pa nga nakabantay si Idano nga dunay kanaas sa iyang tindahan maong iyaha kining gisubay, naabtan niya ang duha nga nagpas-an na og duha ka sako gikan sa iyang tindahan ug daling misakay sa usa ka traysikad.
Dali niyang gisusi ang tindahan ug diha niya nakita nga wala na ang duha ka LPG tanks, usa ka double burner stove, pulo ka food keeper, lima ka towel, usa ka 501 jeans, usa ka planggana, lima ka kaha sa softdrinks ug salaping cash P3,000.00.
Way swerte ang mga suspek human sila nadakpan sa follow-up operation sa mga sakop sa Pardo Police Station.
Apan wala pa mabawi ang mga kinawat sa duha tungod kay giingong nadispatsar na nila kini sa Barangay Duljo-Fatima. – /EIM) (BANAT NEWS)