CEBU, Philippines - Duha ka mga bukog sa tawo ang napalgan sa managlahing mga dapit sa Tacloban City nga gituohang mga biktima sa nakalabay’ng tuig sa bagyong Yolanda.
Ang pagkakaplag niini nahitabo duha ka semana human sa kasumaran sa trahedya, ang mga bukog sa tawo napalgan sa usa ka subdivision sa Barangay Tigbao sa San Jose, Tacloban City, sumala pa sa report sa Interaksyon.Com.
Sumala pa ni Tacloban City Fire Marshall Chief Inspector Charlie M. Gerzon nga dunay mitawag sa ilang buhatan gikan sa Richwell Subdivision sa Barangay Tigbao nga nagpahibalo nga dunay ulo nga kalabira nga ilang nakuykuyan sa gihawanan nga bahin sa maong subdivision.
Ang Special Rescue Unit (SRU) pinangulohan ni Fire Officer 3 Ambel G. Sison daling miadto sa lugar ug gikuha kini aron dad-on sa National Bureau of Investigation Office alang sa pagkuha og DNA sample. Human niini, gidala ang mga bukog sa Holy Cross Memorial Garden diin gilubong ang liboan pa ka mga biktima. Base sa gisuot sa kalabira, kini iya sa usa ka babaye. Sayo nianang adlawa, laing kalabira usab ang nakuykoyan diha sa Sitio Kataisan, Barangay 88, San Jose duol sa tugpahanan sa Tacloban. Niadtong Septiyembre ug Oktubre, dunay mga kalabira gihapon nga nakuha gikan sa Burayan Bridge ug sa Barangay Manlurip, San Jose. Base sa talaan, ang Special Rescue Unit nakarekober na og 2,967 ka mga kalabira sa Tacloban City.
Gituohan nga mokabat og dos mil ngadto sa singko mil ang nakalas sa Tacloban City pa lamang. Ang Tacloban City adunay gihulma nga Management of the Dead and Missing aron maoy moasikaso sa ingon niini nga mga kaso. (BANAT NEWS)