CEBU, Philippines - Notoryos nga Abu Sayyaf leader nga dunay P5.3 milyones nga patong sa iyang ulo ang napatay ug usa ka sundalo ang namatay samtang laing usa ang naangol atol sa pagsikop sa maong terorista sa Barangay Duyan Kaha, Parang, Sulu.
Sumala pa sa report sa Philstar.com, ang Abu Sayyaf leader nga napatay mao si Sihata Latip kansang tinuod pangalan mao si Sihata Muallom Asmad.
Ang commander sa Joint Task Force nga si Col. Alan Arrojado mibutyag sa mga tigbalita nga misukol si Latip ug nakigpinusilay sa mga sundalo ug mga polis nga misuway unta pagdakop kaniya.
Apan usa ka sundalo ang iyang napatay ug laing usa ang naangol sa maong operasyon. Ang suspek gikatahong nalambigit sa mga bayolenteng pagpangatake sa maong probinsya sa nangaging mga katuigan.
Gilambigit siya sa pag-kidnap sa usa ka Taiwanese ug sa magtiayong Germans nga nakauli na sa ilang mga lugar apan mibayad og minilyon ka pesos nga ransom.
Si Latip o Asmad dunay mga warrant of arrest sa kasong kidnapping and serious illegal detention (CC#128923-H A-E) dihang ilang gironda ang Golden Harvest Plantation ug kadtong Jehovah Witnesses kidnaping cases. (BANAT NEWS)