CEBU, Philippines - Ang Koalisyon ng Mamayan Para sa Reporma (KOMPRE) miawhag sa mga magbabalaod sa Kongreso ug Senado nga dalion nila pagpasar ang balaod nga magdili g’yud sa political dynasty.
Ang gitawag og political dynasty mao nga ang mga sakop sa pamilya maghupot og lainlaing katungdanan sa kagamhanan. Adunay mga dapit nga ang sama nga banay maoy maghupot pagka gobernador, bise gobernador, kongresista, mayor ug uban pa nga puwesto.
Matud sa grupo nga ang political dynasty hulga kini sa demokrasya sa nasud. Ilang gibasehan ang 1987 Constitution nga nagmando sa gobiyerno sa pagbantay sa demokrasya sa nasud.
Ang KOMPRE nagkanayon nga 27 ka tuig na ang nakalabay nga ang balaudnon kabahin sa political dynasty wala pa gayud mapasar kay ang mga magbabalod apil nga supak.
Si Supreme Court Justice Antonio Carpio mibatbat sa kaso “Navarro vs. Ermita” nga ang mga sakop sa pamilya pagbanus-banos lang aron sila makaipsot sa “term limit” nga nagdili pagserbisyo subra sa siyam ka tuig.
Si Senate President Franklin Drillon nagtuo nga ang anti-political dynasty bill hayan mapasar na kini sa Kongreso karon nga si Presidente Aquino misuporta sa maong balaudnon. (BANAT NEWS)