CEBU, Philippines - Nasikop ang duha ka lalaki nga nikawat sa upat ka manok pangsabong nga nagkantidad og P40 mil ug usa ka Irish Dom nga nagkantidad og P15 mil nga gipanag-iya sa ilang amo sa lungsod sa Liloan niadtong Huwebes sa kaadlawon.
Ang biktima giila nga si Calvin Rosellosa Jr., 25-anyos, taga Yellow Rose, Yati, sa maong lungsod.
Ang mga suspek mao sila Josuha Dagang, 18, taga Bantige, Ormoc ug caretaker sa mga manok, ug si Marcelo Cris Wagas, 44, taga Looc, Poblacion, Liloan ug tubero sa balay sa biktima.
Base sa imbestigasyon sa kapolisan nga niadtong Miyerkules sa alas 6 sa buntag, nipahibawo si Dagang sa tag-iya nga nawala ang mga manok.
Daling gipangita sa tag-iya ang nangawala nga manok apan pagka-gabii sa maong adlaw, niadto sa balay sa tag-iya ang ikaduha nga suspek ug gi-uli ang tulo ka manok.
"Pagkahibaw ani’ng Wagas nga nangita diay ang tag-iya sa mga manok, iya ning gi-uli dayun kay wa man kuno siya kahibaw. Giilad man daw kuno ni siya ni Dagang nga ipabaligya daw kay reject. Sa dihang wala gihapon nakit-an ang duha pa ka manok, nangayo na og tabang sa kapolisan ang tag-iya," sigon ni SPO1 Bryan Batiquin sa Liloan Police Station.
Nasikop pinaagi sa follow-up operation si Dagang nga maoy nangulo sa pagpangawat.
Gisikop sab si Wagas human nabawi gikan sa usa ka Celso Adlawan ang Irish Dom nga manok ug nitug-an nga siya ang gibaligyaan ni Wagas niini.
Kasamtangang gibalhug ang duha ka suspek sa Liloan Police Station samtang nagpaabot sa ipasaka nga tukmang kaso. (Sharmaine Kaye F. Obra, USJ-R Masscom Intern/GMR)(BANAT NEWS)