CEBU, Philippines - Barangay kapitan sa Hilotongan sa lungsod sa Cordova ang gidakop sa kapolisan apil ang usa ka babaye nga gipasanginlang iyang karelasyon pinasikad sa warrant of arrest tungod sa kasong Adultery kagahapon sa hapon.
Ang gidakop mao si Kapitan Melchor Ompad, 55, ug ang usa ka Mirachell Pinote, 38, residente sa maong barangay.
Ang duha buwag nga gidakop nila ni Police Officer 3 Noem Rosillosa ug Police Officer 2 Vilma Degamo sa Cordova Police Station.
Ang mga polis armado og warrant of arrest nga giisyu ni MTCC Judge Jocelyn Uy-Po sa Municipal Circuit Trial- Consolacion and Cordova nga penetsahan niadtong Nobiyembre 19 ning tuiga.
Nasayran nga ang bana ni Pinote maoy mipasaka og kaso batok sa duha hinungdan nga nalutsan og warrant of arrest.
Si Rosillosa mitug-an sa mga tigbalita nga gidakop ang duha sa managlahing lugar. Si Pinote gidakop sud sa iyang tindahan samtang si Ompad gidakop sulod sa usa ka kan-anan sa maong dapit.
Ang duha nakapiyansa og tag P12 mil matag usa alang sa ilang temporaryong kagawasan.
Dihang gikuhaan sa mga tigbalita sa ilang pamahayag, wa motubag ang babaye samtang limitado lang ang pamahayag ni Ompad.
Apan kusganong gihimakak ni Ompad nga duna silay relasyon ni Pinote.
Si Ompad anaa na sa kataposan niyang termino. (Christell Fatima M. Tudtud/EIM)(BANAT NEWS)