CEBU, Philippines - Gipahimangnoan sa opisyal sa Department of Interior and Local Government -7 ang mga opisyal sa konseho sa Dumanjug nga mobati og kaikog sa ilang mga konstituwente.
Nasayran nga unom ka bulan nang walay napahigayong sesyon ang konseho tungod kay pirmeng dili magka-quorum ug niadtong adlaw nga Miyerkules nagka-quorum na unta human gipadakop ni Bise Mayor Efren Gontrano Gica sa mga polis ang mga konsehal diha sa ilang mga opisina ug gipatambong sa sesyon.
Apan wala gihapon mahinayon kay diriyot magsumbagay sila si Gica ug igsuon niining si Konsehal Erwin Gica batok ni Konsehal Eliezer Amadora tungod lang sa bangko.
Si Jerome Gonzales, ang operations officer sa DILG sa probinsiya nagkanayon nga angay maikog ang mga opisyal sa lungsod tungod kay ang apektado niini ang mga residente.
Sud sa unom ka bulan, 24 unta ka sesyon ang napahigayon sa konseho sa lungsod apan wala kini mahitabo.
Si Mayor Nelson Garcia nangayo na og tabang sa DILG bahin sa problema nga nagsumikad tungod sa politika.
Si Gonzales nga nahinabi sa mga tigbalita kagahapon nagkanayon nga nasayod na ang mga opisyal sa ilang obligasyon isip mga piniling opisyal ug ang pagpadakop kanila sa bise mayor, katungod kini niini subay sa balaod.
Matud pa ni Gonzales walay adjudicatory function aron mosilot ang DILG kondili monitoring lamang ug paghatag og pahimangno.
Apan ang Sangguniang Panlalawigan dunay gahom paghimo og imbestigasyon sa isyu ug modesisyon kung kinsay angay silotan.
Mipasidaan si Gonzales nga kun magpadayon kini nga problema, way mga resolusyon sa mga proyekto nga mapalabang ug tungod niini ang pundo gikan sa national government mabalik sa kaulohan. (BANAT NEWS)