CEBU, Philippines – Gipasakaan og kasong estafa ang usa ka 64-anyos nga babaye nga gipasanginlang fixer sa Land Transportation Office-7 human kini nasikop sa entrapment operation sa mga sakop sa Carbon Police Station sa Cebu City Police Office.
Ang nasikop naila nga si Gladys Olmos, taga Clavano Street, Capitol ning dakbayan sa Sugbo human kini gireklamo ni Alan Pagura, 45, taga Pahina Central, Cebu City. Sumala pa nga nakahatag na og kwarta si Pagura ngadto ni Olmos aron malihok ang plate number sa iyang sakyanan, apan peke ang nahatag niini, apan ang resibo nga gigamit, official receipt g’yud sa maong buhatan. Tungod niini, midangop siya sa kapulisan ug gilusad ang entrapment operation dihang nangayo kini pag-usab sa bayad nga kuwang. Gamit ang P4,750 nga entrapment money nasikop si Olmos. Matud pa ni Police Officer 1 Dennis Ornopia ang desk officer sa Carbon Police nga gipasakaan na og kaso kagahapong adlawa ang maong lola. – /EIM) (BANAT NEWS)