CEBU, Philippines – Gituohan nga magbalhin-balhin lang og pinuy-anan ang mga responsabli sa mga tulis sa dakbayan sa Mandaue.
Kini ang gibutyag ni Police Chief Inspector Michael Anthony Bastes, hepe sa Investigation Detective Management Branch sa Mandaue City Police Office.
Si Bastes mibutyag nga iyang gitigum ang iyang mga sakop ug gimandoan nga kinahanglan kun dunay mga panghitabo sa ilang area of responsibility mohimo gyud sila og follow-up ug makig-alayon sa Regional Intelligence Division sa Police Regional Office -7.
Gihulagway ni Bastes nga managlahi ang grupo nga mihimo sa krimen sa siyudad sa Sugbo ug siyudad sa Mandaue kay managlahi man ang description.
Matud niya nga gagmay’ng grupo lang ang mihimo sa pagpanulis kay mga ginagmay ra usab ang ilang mga puntariya. – /GMR) (BANAT NEWS)