CEBU, Philippines - Parti sa duha ka andanang panimalay sa lungsod sa Minglanilla, naugdaw ug nagbilin og P80 mil nga danyos human miulbo ang tangke sa Liquefied Petroleum Gas (LPG).
Swerteng walay naangol o nakalas sa maong pagbuto apan gilamoy sa sunog ang panimalay sa managtiayong Alberto ug Eulalia Larrobis. Sigon pa sa magtiayon nga midagkot sa stove gamit ang posporo ang ilang anak nga si Michael Oberes Larrobis, 29, aron unta magluto sa dihang mikalit og ulbo ang ilang tangke sa LPG.
Matud ni Fire Officer 1 Bolo Emmanuel sa Minglanilla Fire Station nga nadawat sa ilang buhatan ang alarma alas 11:30 sa buntag ug milungtad og 45-minutos ang ilang kombate sa kalayo apan wa hinuon kini makatapon sa kasikbit nga kabalayan. (BANAT NEWS)