CEBU, Philippines - Awhagon ni Bokal Raul “Yayoy” Alcoseba ang mga mayor sa kalungsuran sa pagparehistro sa mga senior citizens sa ilang lugar aron makadawat sa hospital benefits sa PhilHealth.
Kini subay sa Akta Republika No. 10645 kon ang “Mandatory PhilHealth Coverage for Senior Citizens” nga gilagdaan ni Presidente Benigno Aquino III niadtong Nobiyembre 5.
Pormal nga moduso og resolusyon si Alcoseba, chairman sa committee sa senior citizens sa hunta probinsiyal, atol sa ilang sesyon karong hapon. Matud ni Alcoseba nga gikinahanglan nga ang mga senior citizens dunay mga ID pagmatuod nga sila mga senior citizen aron makadawat sila sa benepisyo. Sobra sa 100,000 ang gidaghanon sa senior citizens sa probinsiya ug gilauman nga modaghan pa tungod sa padayong validation sa mga senior citizen sa kalungsuran.
Usa sa problema nga nasinati mao nga dunay mga senior citizens nga wala’y ID ang mangayo og apil kung dunay ipanghatag nga hinabang apan dili mahatagan tungod kay wala malakip sa budget kay wala marehistro.
Ang probinsiya may programa sa senior citizens nga gitawag og “Halad ni Lola ug Lolo” diin sila hatagan og bugas ug mga delata.
Gawas niini ang mga senior citizens hatagan usab og libreng tambal ug hospitalization benefits sa Vicente Sotto Memorial Medical Center. Tinguha sa Kapitolyo nga mahatagan og tag P1,000 ang mga senior citizens sunod tuig. (BANAT NEWS)