CEBU, Philippines - Nahanaw ang mga mahalong butang sa balay sa usa ka Overseas Filipino Worker (OFW) sa sitio Cambado, Gairan, dakbayan sa Bogo nga gilungkab alas 9 pasado sa buntag niadtong Sabado.
Si PO2 Leonidez Pedrano sa Bogo City Police Station miila sa tag-iya sa panimalay nga gilungkab sila si Elmer Verdida, 42 ug Jocelyn Verdida, 41.
Matud ni Pedrano nga alas 8 sa buntag sa maong adlaw nibiya sa ilang panimalay si Jocelyn paingon sa Manila sa pagsugat sa iyang bana nga si Elmer gikan sa Saudi Arabia.
Dugang pa ni Pedrano nga sa pagbiya niini sa ilang panimalay maoy nibanos ang mga wala hiilhing kawatan nga miagi sa bintana sa balay pinaagi sa paglungkab sa sliding door.
Nadiskubrehan sa igsuon ni Jocelyn ang pagpanglungkab nga hinungdan nga dali kining mitaho sa kapolisan.
Sa pag-imbentaryo nga gihimo nasayran nga nahanaw na ang usa ka laptop nga P30 mil ang kantidad, Tablet nga P5 mil, Galaxy cellphone nga P32 mil, My Phone nga P33 mil, cash nga P2,600 ug mga alahas nga naglakip sa kuwentas nga bulawan nga P8 mil ug bracelet nga bulawan nga P12 mil ang kantidad.
Gitataw ni Pedrano nga layo sa mga silingan ang panimalay hinungdan nga wala’y nakamatikod dihang nahitabo ang pagpanglungkab.
Samtang usa ka kolektor sa lending ang nabiktima sa pagpanulis sa Poog, Toledo City pasado alas 2 sa nakalabay nga hapon.
Ang biktima naila nga si Michel Manulat, 28, lumad nga taga Tambulig, Zamboanga del Norte ug kolektor sa DIPAG Southern Star Lending Corporation sa dakbayan sa Carcar.
Matud sa biktima nga samtang siya nangolekta sa ilang mga kostumer sa maong lugar, usa ka motorsiklo ang nihunong sa iyang tungod sakay ang duha ka lalaki nga nag-helmet ug kalit lang nanion kaniya og .38 revolver dayon mando nga ihatag ang iyang kuwarta.
Nakuha sa duha ka tulisan ang P10 mil nga koleksiyon sa biktima, cellphone, apil pa nga gidala sa tulisan ang iyang helmet ug yawe sa iyang motorsiklo. (BANAT NEWS)