CEBU, Philippines - Pwerteng kurata sa usa ka mananagat nga namasol sa Suba Bridge sa Barangay Poblacion, Liloan human nga patay nga tawo ang “mikubit” sa iyang pasol.
Si Police Officer 1 Eden Pepito sa Liloan Police Station miingon nga alas- 9 sa gabii dihang nahaw-as ang patay’ng lawas ni Claudio Aniel, nga taga Sitio Landing Barangay Poblacion sa maong lungsod.
Matud pa ni PO1 Pepito, usa ka Sony Casbi, 38, namasol nianang tungora dihang kalit nga nabitad ang iyang bingwit, ug tungod sa kabug-at niini, nagtuo g’yud kini nga dakong isda ang mikubit. Apan nakurat kini nga tawo diay ang natag-an sa iyang pasol.
Ang mga kabanay ni Aniel mitug-an sa kapolisan nga human sa panihapon miggawas kini sa ilang balay ug misakay og traysikad padulong sa Suba Bridge aron magpahayahay.
Nagtuo ang pamilya nga nakatagpilaw ug natagak sa taytayan ug naparok ang ulo niini sa mga bato nga nakaingon sa iyang kamatayon.
Samtang sa lungsod sa Malabuyoc, usa ka Joven Yu Montalbon,42, usa ka construction worker ang namatay human gituohang aksidenteng natagak sa seawall ug nitugpa sa mga bato.
Sa eksaminasyon ni Dr. Runiquiza Aloba, municipal health officer, naputos og samad-samad sa ulo ug bun-og sa lawas si Montalbon kinsa uwahing nakit-ang nakig-inom sa usa ka videokihan sa maong dapit.
Dihang nanirado na ang imnanan, pwerteng huboga na ni Montalbon ug natulog sa sementadong bangko kilid sa seawall nga dunay gihabugong 20 ka tiil.
Nagtuo ang kapolisan nga nahug kini ug nabunal-bunal sa seawall ug mga bato ayha pa natagak sa dagat.(Romeo T. Limpangog ug Jean Lumapas, USJ-R Intern/EIM)(BANAT NEWS)