CEBU, Philippines - Nag-ilog ang mga opisyal sa lungsod sa Dumanjug sa pagpangapod-apod sa mga bugas gikan sa Kapitolyo alang sa mga senior citizens. Si Dumanjug Mayor Nelson Garcia ningreklamo nga gikuha ni Bokal Christopher Baricuatro ang mga bugas gikan sa Provincial Social Welfare and Development Office.
Matud ni Garcia nga si Baricuatro ang nangapod-apod sa bugas dungan ang pahibawo nga modagan siya sa pagka-mayor sunod eleksiyon.
Wala makontak si Baricuatro alang sa iyang reaksiyon apan ang kasamtangang pangulo sa PSWDO, Rose Jao, nikompirmar nga si Baricuatro ang nikuha sa bugas ug may pagtugot ni Bise Gob. Agnes Magpale.
Matud ni Jao nga ang de latang pagkaon sama sa sardinas, noodles ug tubig ilang ipakuha sa pangulo sa Office of the Senior Citizens Affairs sa Dumanjug.
“Pareho ra man na, ila man na constituents ang mga senior citizens,” matud ni Jao. Giklaro ni Jao nga sila sa PSWDO igo lang nagtuman sa ilang trabaho ug wala na sila’y labot bahin sa politika. (Lorelyn D. Dechos, USJ-R MassCom Intern/GMR)(BANAT NEWS)